Friday, November 16, 2007

إحنا بنغرق ليه


هو احنا بنغرق ليه فى البحر بألنا سنين

طايرين… راكبين… غارقين

مرة طيارة و مرة عبارة

واخر مرة سبعين تمنين مسكين

على إيطاليا كانوا طالعين


يمكن البحر بيكره المصريين؟

يمكن تكون لعنة فرعون لما غرق…معانا ليوم الدين؟

لازم نعرف…هنفضل كده حيرانين؟

ونروح فين و نشكى لمين؟

دا احنا ملايين


سامعين… شايفين… حاسين

ساكتين

والله حاسة فى قلبى سكاكين

طب و بعدين

عارفين

نعمل تحقيق… لأ لجنة

لأ الاتنين


وقضايا و تعويضات و فتاوى

وحبتين

ونزود المساجين

ويهرب الملاعين....واصلين

ونفضل كده دايرين

وتعدى سنة و لا اتنين

وننسى... و نقسى

ويروح تانى..فى حادث تانى

حبة مساكين


Tuesday, November 13, 2007

ابتدى منين


ابتدى منين الحكاية

و الحكاية متتحكيش

فين البداية.... و ملهاش نهاية


فيها ناس كتيره كأنه جيش

فيها الجدع، و أهل البلد، و البت فاطمة

وطابور غلابة مينتهيش

تسمع للصبح حكاوي عجب

متتنيسيش

ومتلأيش

فى قلوبهم ذرة كره

ولا فى جيوبهم تمن العيش

ومتلاقيش


فى عيونهم غير الدمع... و كلمة مفيش